خُداوند یسوع کے عظیم معجزات جو خُدا کی قدرت ظاہر کرتے ہیں
قانائے گلیل میں شادی کی ضیافت میں یسوع مسیح نے اپنا پہلا معجزہ دکھایا اور پانی کو عمدہ مَے میں بدل دیا۔ اِس معجزے سے خُداوند نے اپنا جلال ظاہر کیا اور شاگردوں نے اُس پر ایمان لایا۔ (یُوحنّا ۲:۱-۱۱)
یسوع مسیح نے پانچ روٹیوں اور دو مچھلیوں سے پانچ ہزار مردوں کو کھانا کھلایا اور بارہ ٹوکریاں بچ گئیں۔ خُداوند کی قدرت سے تھوڑا بہت زیادہ ہو گیا کیونکہ خُدا بے حد فراوانی دینے والا ہے۔ (متی ۱۴:۱۳-۲۱)
خُداوند یسوع مسیح رات کے وقت جھیل کے پانی پر چل کر شاگردوں کے پاس آئے۔ پطرس بھی ایمان سے پانی پر چلا مگر خوف سے ڈوبنے لگا تو یسوع مسیح نے فوراً ہاتھ بڑھا کر اُسے تھام لیا اور فرمایا: "اے کم اعتقاد تُو نے کیوں شک کیا؟" (متی ۱۴:۲۲-۳۳)
جب شاگرد جھیل پر سخت طوفان میں خوفزدہ ہوئے تو خُداوند یسوع مسیح نے ہوا اور لہروں کو ڈانٹا اور بڑا سکون ہو گیا۔ شاگرد حیران ہو کر کہنے لگے کہ یہ کیسا شخص ہے کہ ہوا اور پانی بھی اُس کا حکم مانتے ہیں۔ (مرقس ۴:۳۵-۴۱)
اندھا برتمائی یریحو کے راستے پر بیٹھا بھیک مانگ رہا تھا۔ جب اُس نے سُنا کہ خُداوند یسوع مسیح گزر رہے ہیں تو پکار کر کہا: "اے ابنِ داؤد مجھ پر رحم کر!" یسوع مسیح نے فرمایا: "تیرے ایمان نے تجھے بچایا" اور فوراً اُس کی آنکھیں کھُل گئیں۔ (مرقس ۱۰:۴۶-۵۲)
چار آدمی ایک مفلوج کو چھت کھول کر خُداوند یسوع مسیح کے سامنے اُتار لائے۔ یسوع مسیح نے اُن کا ایمان دیکھ کر پہلے مفلوج کے گناہ معاف کیے پھر فرمایا: "اُٹھ اپنی چارپائی اُٹھا اور گھر جا۔" وہ فوراً اُٹھ کر سب کے سامنے چلا گیا۔ (مرقس ۲:۱-۱۲)
ایک کوڑھی نے خُداوند یسوع مسیح کے پاس آ کر گھٹنے ٹیکے اور کہا: "خُداوند اگر تُو چاہے تو مجھے پاک کر سکتا ہے۔" یسوع مسیح نے ہاتھ بڑھا کر اُسے چھوا اور فرمایا: "مَیں چاہتا ہوں، پاک ہو جا" اور فوراً اُس کا کوڑھ جاتا رہا۔ (متی ۸:۱-۴)
گدرینیوں کے علاقے میں ایک شخص میں بدروحوں کا لشکر تھا اور وہ قبروں میں رہتا تھا۔ خُداوند یسوع مسیح نے اُن بدروحوں کو حکم دیا اور وہ سُوروں کے غول میں جا گھُسیں۔ وہ شخص اپنے ہوش میں آ کر خُداوند کے قدموں میں بیٹھ گیا۔ (مرقس ۵:۱-۲۰)
لعزر کو مرے چار دن ہو چکے تھے اور وہ قبر میں رکھا تھا۔ خُداوند یسوع مسیح نے بلند آواز سے پکارا: "لعزر باہر نکل آ!" اور وہ کفن میں لپٹا ہوا باہر نکل آیا۔ یسوع مسیح نے فرمایا: "قیامت اور زندگی مَیں ہوں۔" (یُوحنّا ۱۱:۱-۴۴)
عبادت خانے کے سردار یائیرس کی بیٹی مر گئی تھی۔ خُداوند یسوع مسیح نے اُس کے گھر جا کر لڑکی کا ہاتھ پکڑا اور فرمایا: "طلیتا قُومی" یعنی اے لڑکی اُٹھ! وہ فوراً اُٹھ کر چلنے پھرنے لگی۔ (مرقس ۵:۲۱-۴۳)
ایک عورت بارہ سال سے خون بہنے کی بیماری میں مبتلا تھی اور بہت حکیموں سے علاج کرا چکی تھی۔ اُس نے ایمان سے خُداوند یسوع مسیح کی چادر کو چھوا اور فوراً شفا پائی۔ یسوع مسیح نے فرمایا: "بیٹی تیرے ایمان نے تجھے بچایا، سلامت جا۔" (مرقس ۵:۲۵-۳۴)
شاگردوں نے ساری رات محنت کی مگر ایک مچھلی بھی نہ پکڑ سکے۔ خُداوند یسوع مسیح نے فرمایا: "گہرے پانی میں جال ڈالو۔" اُنہوں نے حکم مانا اور اِتنی مچھلیاں پکڑیں کہ جال پھٹنے لگے۔ پطرس نے خُداوند کے قدموں میں گر کر کہا: "مجھ سے دُور ہو کیونکہ مَیں گناہگار ہوں۔" (لُوقا ۵:۱-۱۱)